Sporin hræða

Ég er farin að fá svona "deja vu" að fylgjast með umræðum um sundabraut-göng. Mig minnir að fyrir einungis þremur árum síðan voru mikil skoðanaskipti og deilur um færslu Hringbrautar sem á endnum var troðið ofaní dýrmæta Vatnsmýrina í óþökk meirihluta borgarbúa til að spara nokkra milljarða.

Í dag er það almennt viðurkennt að færsla Hringbrautar sé skipulagsslys og muni í fyllingu tímans verða leiðrétt, þ.e. sett í stokk.Það er dýrt að spara og betra heima setið en af stað farið með þær úrlausnir sem Vegagerðin kynnir nú fyrir okkur borgarbúum varðandi Sundabraut.

Loftmengun er nú þegar oft langt yfir hámörkum í Langholts og Vogahverfi vegna nálægðar við Sæbraut og umferðarinnar sem fylgir starfseminni við Sundin. Með sundabraut með ca. 50.000 bílaumferð á sólarhring er hætta á að nánast ólíft verði að búa í þessum hverfum. Með því koma umferðinni í göng og dreifa umferðinni er komið í veg fyrir að loftmengun aukist. Það eitt og sér hlýtur að vera nokkra milljarða virði..

Ég treysti því Samgönguráðherra sé fylgjandi gangnagerð í höfuðborginni. Hann er jú aðal hvatamaðurinn að bora í gegnum tvö fjöll á Tröllaskaganaum og tryggja fámennu byggðalagi tengingu við aðrar byggðir á norðurlandi. Það eru dýrustu göngin a.m.k. miðað við fólksfjölda en alltaf hamrað á því að þau væru þjóðhagslega hagkvæm. Hvernig er hægt að réttlæta 8 milljarða göng fyrir fámennt byggðarlag en ekki 24 milljarða fyrir höfuðborgina og þar með stærstan hluta þjóðarinnar. Hvaða reiknilíkan notaði Vegagerðin til að réttlæta Héðinsfjarðargöng?

Annars er ég að missa verðskynið, finnst 20 milljarðar allt í einu ekki vera neitt rosa mikið og ekki heldur plús - mínus 9 milljarðar. Menn eru að tapa milljörðum í úr sínum einkasjóðum á dýfum í kauphöllinni þessa dagana , jafnvel tugum milljarða. Verðmunurinn á ytri og innri leið er bara dagsformið á verðmætaaukningu einhverra fyrirtæka í kauphöllinni. Einhverjir eignuðust jafnvel nokkra milljarða í "nýtanlegu skattatapi". Mjög skrýtið allt saman.

Það er ekki hægt að prútta niður Sundagöng. Það þarf að velja þær vegasamgöngur sem eru bestar fyrir Reykvíkinga og eittvað sem dugar næstu 50 árin, verður ekki úrelt eftir þrjú ár. Ég óska eftir skarpri framtíðarsýn og að menn læri af mistökunum í Vatnsmýrinni.

Í upphafi skal endinn skoða.

Andrea

Vegagerð með bæði belti og axlabönd

Athugasemdir

[sveina sigurdardottir (IP-tala skráð) 13.1.2008 kl. 18:13]

það er nú orðið ansi lítið eftir af fallegu útsýni yfir sundin blá

Hafnarmannvirki og að fá síðan tröllaukna brú yfir sundin er rothögg á íbúa Reykvíkinga. Þessir miljarðar sem sagt er að muni á kostnaði er ekki yfirstíganlegur, annað eins hefur gerst hér.