Loftgæðamælingar í hverfinu okkar

Á daglegri göngu minni með hundinn um daginn rak ég augun í mengunarmælitæki við gatnamót Langholtsvegar og Skeiðarvogs. Ég ákvað að hafa samband við umhverfissvið borgarinnar og fá fréttir af þessum mælingum. Anna Rósa Böðvarsdóttir svaraði erindi mínu og sagði þetta vera farstöð Umhverfis- og samgöngusviðs og verið sé að mæla ákveðin efni í loftinu, svo sem köfnunarefnisdioxið (NO), svifrik o.fl. Farstöðin er nú farin eitthvað annað en mældi loftgæði hjá okkur frá 19. febrúar til 28. mars. Hægt er að sjá niðurstöður mælinga á www.loft.rvk.is undir linknum færanleg farstöð. Mæld eru NOx efni og svifryk (PM10)  þ.e. þau efni sem talin eru líklegust til að fara yfir heilsuverndarmörk.
Verið era ð vinna  skýrslu um mælingarnar sem vonandi verður bráðlega tilbúin og birt opinberlega. Forvitnilegt verður að bera niðurstöður saman við mælingar sem gerðar voru á sama stað með sama hætti fyrir tveimur árum. Sú skýrsla fylgir hér með (sjá fyrir neðan) og er mjög fróðlegt að glugga í hana. Þar kemur fram að loftmengun inní þessari íbúðabyggð  mældist svipuð og við umferðaræðina Miklubraut. En sú niðurstaða kom nokkuð á óvart og niðurlag skýrsluhöfunda (Anna R Böðvarsdóttir og Lúðvík Gústafsson) er svona:
“Þessar niðurstöður kalla á frekari mælingar á þessu svæði og fleiri gatnamótum í ́íbúðabyggð Reykjavík til að komast að því hvort loftmengun er meiri þar en við helstu  umferðaræðar.  Ef loftgæðin eru svipuð i íbúðabyggð og við helstu umferðaræðar í Reykjavik  er ljóst að aðgerða er þörf víða í borginni til að tryggja íbúum viðunandi lí́fsskilyrði. Minna  má í þessu sambandi á ákvæði um heilsuverndarmörk fyrir svifryk (PM10) sem taka gildi árið  2010  (sjá rg.  nr.  251/2002).  Styrkur  svifryks  (PM10)  er  meiri  en  nemur  þessum  heilsuverndarmörkum og eru því borgaryfirvöld skuldbundin til að draga úr loftmengun þar til ástandið  er  orðið  viðunandi...                                                                                    

...Umhverfissvið  Reykjavíkurborgar  telur  brýnt  að  ræða  raunhæfar  aðgerðir  til  að  minnka loftmengun í í́búðarbyggð. Fordæmi eru að finna í aðgerðum annarra borga í Evrópu  sem glíma við sambærilegan vanda. Nefna má nokkur dæmi svo sem: 

1.  Að draga úr umferðarhraða.  

2.  Að takmarka umferð þungra flutningabifreiða. 

3.  Að minnka bílaumferð um íbúðahverfi almennt, þ.e. almennan gegnumakstur.”

Ég hjó sérstaklega eftir þessari setningu: "Ef loftgæðin eru svipuð i íbúðabyggð og við helstu umferðaræðar í Reykjavik  er ljóst að aðgerða er þörf víða í borginni til að tryggja íbúum viðunandi lí́fsskilyrði"

Ég held að þarna sé mikið verkefni fyrir höndum ef eitthvað á að gera með þessar niðurstöður og ég held að við íbúar ættum að fylgja því eftir að það sé gert.

 

Sigríður Ólafsdóttir 

Skrár tengdar þessari bloggfærslu:

• helstu_ni_ursto_ur_loftgae_amaelinga_a_gatnamotum_langholtsvegar_og_skei_arvogs.pdf
• heilsufarsskyrsla_-_lokautgafa.doc

Athugasemdir

[Andrea (IP-tala skráð) 31.3.2008 kl. 21:46]

Þetta er áhugaverð samantekt og sérstaklega að yfirvöld verði skuldbundin frá 2010 að draga úr loftmengun í íbúðarhverfum.

Mér sýnist loftmengun einmitt hafa aukist töluvert með aukinni bílaumferð sem fer í gegnum hverfið okkar. Og enn mun mengun aukast með risa umferðarmannvirkjum sem eru fylgifiskar Sundabrautar ef hún kemur og nú byggist svæðið hratt upp við Glæsibæ, Suðurlandsbraut og Menntaskemmtigarði. Ég get ekki séð að þessi reglugerð breyti nokkru varðandi mengun í íbúðarhverfum. Það er kannski kominn tími á að hverfasamtök ráði sér lögfræðinga til að fá úr þvi skorið hvort hægt sé endalaust að troða mannvirkjum inní rótgróin íbúahverfi þegar lög segja til um annað.

[Sigríður (IP-tala skráð) 31.3.2008 kl. 22:31]

Já það virðist ekkert vera í kortunum sem bendir til að stjórnvöld, hvort sem það er ríki eða borg séu með áætlanir eða áform til að framfylgja þessari reglugerð, þvert á móti virðist stefnt hraðbyri í aðra átt svo sem sjá má á áætlunum um mislæg gatnamót og hraðbrautir sem gera varla annað en auka á umferð og þar af leiðandi loftmengun.

[Andrea (IP-tala skráð) 31.3.2008 kl. 22:40]

Það er líka hætta á að yfirvöld fái undanþágu frá þessum mengunarhámörkum vegna sér íslenskra hagsmuna, sbr. undanþágu frá mengunakvótum v/stóriðju. Við höfum nú heldur betur fordæmi þar.

[Íbúasamtök 3. hverfis, 2.4.2008 kl. 18:42]

Færanlega mælistöðin var staðsett í miðju Hlíðahverfi frá 5. des til 16. janúar. Þar reyndist meðaltal 22,65% hærra en á Grensás og í þurru og stillu voru PM gildin meira en 40% hærri. Svifryk á tímanum frá 1. jan - 11. jan þegar var lyngt og stillt, fór 5 sinnum yfir heilsufarsmörk og NO2 fór einu sinni. Á sama tíma fór PM10 einu sinni yfir heilsufarsmörk á Grensás. Miðað við Kandadíska könnun, þá er samfélagskostnaður af völdum umferðarmengunar í höfuðborgarsvæðinu um 30 milljarðar á ári! Og til upplýsinga er Reykjavík með mesta loftmengun allra höfuðborga Norðurlandanna.

Niðurstöður og ítarupplýsinga á vefsíðunni okkar! 

[Sigríður (IP-tala skráð) 2.4.2008 kl. 20:48]

Já þetta er óhuggulegt en óhugguegast af öllu er sinnuleysi fólks og borgaryfirvalda gagnvart þessu. Borgin er með stofnun sem mælir þetta og leggur til úrbætur en enga stofnun eða vilja til að framkvæma úrbætur eða taka á þessu. Sennilega eru allir samsekir því við íbúar erum ekki nógu viljug að gera það sem í okkar valdi stendur til að bæta úr.

Ég var um daginn stödd í Keflavík á sólbjörtum degi og það var ófögur sjón að líta til höfuðborgarsvæðisins. Borgin var hreinlega í gulbrúnum grútarmekki. Ég íhugaði að koma börnunum mínum fyrir á öruggum heilsusamlegum stað langt utan borgarinnar en þar sem ég er samsek öllum hinum sem fljóta sofandi að feigðarósi hef ég ekkert gert annað í þessu en nöldra á blogginu.

[Andrea (IP-tala skráð) 2.4.2008 kl. 22:55]

Við höfum rétt á því að búa í umhverfi sem er ekki heilsuspillandi. Lögin sem taka gildi 2010 staðfesta það. Geta íbúar - íbúasamtök leitað réttar síns ef borgaryfirvöld taka ekki í taumana? Er kannski einhver glufa sem býður upp á að við getum ráðið okkur lögfræðing - eða umboðsmaður íbúa??'?

Fara í mál við borgina þegar PM10 fer ítrekað yfir heilsumörk.