Soffía frænka á ferðinni?

Undirrituð varð upptendruð af snyrtiástríðu Soffíu frænku frá Kardimommubæ þegar heim var komið úr stuttri gönguferð. Ég sótti mér strákúst og réðst með mikilli vandlætingu á sandbreiðurnar sem Reykjavíkurborg hefur af elju dreift yfir gangstéttina fyrir ofan blokkina mína. Það viðraði vel til slíkrar tiktúru - svalur og léttur andvari sem blés rykinu frá mér jafnharðan svo ég stæði ekki í mekkinum eins og einmana kúreki norðursins. Af og til gerði ég þó hlé á hamhlaupum mínum þegar gangandi vegfarendur nálguðust hlémegin svo vit þeirra fylltust ekki af sandi.

Ég lýsi eftir farartæki til sömu nota og á myndinni hér til hliðar, þó ekki fyrir mig prívat og persónulega, ásamt bílstjóra frá Borginni til að hreinsa upp göngustíga og gangstéttir um alla borg. Um helgina fór ég að hjóla eftir vetrardvalann og varð víða að fara varlega út af sandhryggjum þar sem reiðhjól skrika auðveldlega. Í mölinni er ýmis annar ófögnuður, svo sem glerbrot, sem skerst léttilega í gegnum dekkin.

En það er vorhugur í hverfisbúum. Framhjá mér fóru stálpaðir strákar í stuttermabolum á reiðhjólum, tveir skokkarar, kona með barnavagn, ung kona á röskri göngu og tvær unglingsstúlkur í frárenndum jökkum. Skora ég á hverfisbúa að rölta út á stétt með sóp í hönd og hafa ómakið af borgarstarfsmönnum á sóparatryllitækjum sem geta þá einbeitt sér að göngustígunum í staðinn.

Ólöf